عناوين ونصوص القصائد   أسماء الشعراء 
الشعراء الأعضاء .. عامِّي > مصر > جمال مرسي > بياع المناديل

مصر

مشاهدة
286

إعجاب
0

تعليق
0

مفضل
0

الأبيات
0
إغلاق

ملحوظات عن القصيدة:
بريدك الإلكتروني - غير إلزامي - حتى نتمكن من الرد عليك

إرسال
انتظر إرسال البلاغ...

بياع المناديل

راح احكيلكم حكاية طفل م. الأول
على لساني
وعمري ماكنت يوم كداب
ولا جاني.
برغم ظروفْ كتير قاسيه
ولا يعلمها إلا الله
برغم الآآآآآه تزلزل كل أركاني
لقيت نفسي و انا عمري سنين عَشَرهْ
يتيم في الدنيا وحداني
مفيش غير أم مسكينه بترعاني
وأخت جميله زي البدر
بس جمالها ربّاني
أبويا قبل لما يموت نده لامِّي و بص لها
بنظرة شوق.
نده لاختي و بص لها كمان بحنان
كأنه عارف ان النظره من عينهْ دي آخر شيء
وروحه الطاهره بعديها
حتصعد فوق.
وناداني
وقال لي كلامهْ ف. وداني
ووصاني
فهزيت لهْ انا راسي
لقيت دمعي هرب مني
عشان يفضحني قدامه و يفضح كل إحساسي
وقابل ربه .. خلاني
وانا غرقان ف. أحزاني
وأمي الصابره تحسبها يمين و شمال
ودمع العين على خدودها نازل شلال
تقول يا عيال
معاشه يا دوب يكفي القوت
يا إما نموت
في دنيا قاسيه لا بترحم ولا بتدي
دهبْ و ياقوت .
لقيت نفسي ببيع مناديل
أروح الصبح مدرستي
وبعد الضهر ما يأدِّنْ
ألف بدستتين مناديل لحد الليلْ
تاخدني اشاره لإشاره
وشارع ينتهي بحاره
أروح بيتنا و انا مهدود
الاقي امي بتستنى بدمع العين
واختي قاعده جنبيها تصبّرها
تقول يا ابني:
دروسك مين يذاكرها
أقول يا امّهْ:
سيبيها لربك المعبود يدبرها
واقوم أقرا
لحد النوم ما يغلبني
وتاني يوم .. ساعاته كنت اكررها
ويمضي العمر و انا بكبر
ولسه بنادي ع. المناديل
واقول يا امّه: ما عادش كتير
خلاص هانت
فاضل كام شهر و اتخرج من الجامعه
واحقق كل أحلامنا
وانفذ يوم ما وصاني
أبويا و قال لي ف. وداني:
انا عايزك تكون دكتور
تخلي امك في وسط عنيك
ولو تؤمر تقول شبيك
وعايز اختك تجوزها
وفي بيتك تعيش مستور
ولما تعالج الفقرا .. تكون بيهم رؤوف و رحيم
أخيرا بعد ست شهور
سمعت ف. بيتنا زغروته
وشقه صغيَّره فيها كتبت: عيادة الفقرا
وفوقها نوّرتْ قناديل
وفي الشارع .. لقيت عيل لطيف و جميل
بنفس الهيئة و السحنة
يبيع مناديل .
جمال مرسي

25112020م
بواسطة: جمال مرسي
التعديل بواسطة: د. جمال مرسي
الإضافة: الخميس 2020/11/26 02:08:27 صباحاً
التعديل: السبت 2021/04/03 12:16:06 مساءً
إعجاب
مفضلة
متابعة

أضف تعليق

يجب تسجيل الدخول أو الاشتراك أو تفعيل الحساب اذا كنت مشترك لإضافة التعليق


أعلى القصائد مشاهدة للشاعر
أعلى القصائد مشاهدة خلال 24 ساعة الماضية
انتظر معالجة القصيدة ...
جميع الحقوق محفوظة لبوابة الشعراء .. حمد الحجري © 2005 - برمجة وتصميم
info@poetsgate.com