تاريخ الاضافة
الأحد، 15 أبريل 2007 09:22:52 ص بواسطة محمد أسامة
0 1051
منديل الغريب
تانى يا عمّتى؟؟
بتشمى ريحة عشقك الشارد فى منديل الغريب
كان ياما كان
كان فبه شجر وغيطان وحدوته وسهر
وعيال تشت البلح وهيه بتلاعب النخل استغمايه
كان ياما كان
طب عيطى ان كان لابد من العياط
واكشفى راسك واخبطيها فى الحيطان
مش قالك الولد الصغّير
اننا ف عصر الكمبيوتر والمناديل الورق
مش قلتلك لملمى دموعك
من تحت بيادات العساكر وابلعيها
يا عمتى ما عادش حد بيفتكر
الفديو جيم نسى العيال أساميها
والنهر متعبى ف قزايز البيبسى
والعشق حتى العشق متشفر!
ما عادتش تنفع رعشتك لا غنوه ولا عدودة
كل السكك متقفله وخطوتك محدوده
وام الشهيد محسوده لو افتكرها المسلسل!
بحر الهوا مرشوق سفن متحالفه
أمريكا حالفه ونسل العرب متحدد
الجاز يطولك وانتى ف حضن السنابل
شط العرب ما كتبشى ولا كلمه ف جواب ابنك
ما قالش إنه أسير ولا استشهد
ما تدوريش على معنى الحزن غير فى الحلم
كل اللى ضاعوا مفقودين ف الحرب
زى اللى ماتوا ع السرير فى السِلم
إسم الشاعرإسم الكاتبالبلدإسم القسمالمشاهدات
سمير الأميرسمير الأميرمصر☆ دواوين الأعضاء .. عامِّي1051
لاتوجد تعليقات