عناوين ونصوص القصائد   أسماء الشعراء 
شعراء العامية في العصر الحديث > مصر > مجدي نجيب > عروستي

مصر

مشاهدة
1699

إعجاب
0

تعليق
0

مفضل
0

الأبيات
0
إغلاق

ملحوظات عن القصيدة:
بريدك الإلكتروني - غير إلزامي - حتى نتمكن من الرد عليك

إرسال
انتظر إرسال البلاغ...

عروستي

الشمس انشقت في ضفيره يمين
وضفيره شمال
نازلين شلال
بيبوس الكتف
واتشعبطت بسرعه ف أول سكه
واتصورت الليل صاحب .. حانات الرقه
أشرب .. وأشرب .. وألف
فين هيا عروستي
هفت .. رفت ف هدومها التفتاه
الفرحة قالت: آه
مشيت ترقص وعيون خلخالها
بتبوس الأرض
مين هيه اللي عيونها الود؟!
دي عروستي اللي دراعها أجمل من عود الورد
ودراعها من غير الشوك
لكن مليان تعابير وحنان للشوق
مزيكه بتتنفس .. تهمس .. همس
مش عارف مين هيه اللي بتعزف باللمس
فوق ضلعي اللي ف لون الحس
وف ليله .. الليل اتهدل موال
سكران من ريحة فساتين المشمش والحنه
بصيت له سنه
أتاريه كان نور قبل ما أعدّ سنه
ونا لا عرفت أغني ولا أحس هنا
ما قدرتش أزغرد
وأتاريها عروستي اللي بتضحك
كات نجمه وراكبه حصان أبنوس
وشعورها المغسوله بريحة المشمش
بتبوس خطواتي التايهه بتتمزق
هيه عروستي اللي هدومها التفتاه الأزرق
ومخدتها قشر الرمان
ورموشها بحر حنان
دي عروستي ويبقى أبوها الليل
عارفينه؟!
الليل اللي بيبعت نسوانه تقول:
هاتوا المهر
دخان وسجاير وإرايه وصبر
والصبح .. ح نقيم الفرح
يا صحابي الليل كداب
وعيونه أبواب .. أبواب .. أبواب
ورموشه تراب
وبناته ديابا
آه يابا
دا مدينتي حكايه بترباس
لفيت شوارعها ورجعت لبيتنا
من غير .. راس
مجدي نجيب

ديوان صهد الشتاالطبعه الأولى عام 1964 / الطبعه الثانيه عام 1995
بواسطة: محمد أسامة
التعديل بواسطة: محمد أسامة
الإضافة: الجمعة 2007/06/15 09:36:13 صباحاً
إعجاب
مفضلة

أضف تعليق

يجب تسجيل الدخول أو الاشتراك أو تفعيل الحساب اذا كنت مشترك لإضافة التعليق


أعلى القصائد مشاهدة للشاعر
أعلى القصائد مشاهدة خلال 24 ساعة الماضية
انتظر معالجة القصيدة ...
جميع الحقوق محفوظة لبوابة الشعراء .. حمد الحجري © 2005 - برمجة وتصميم
info@poetsgate.com