تاريخ الاضافة
الأربعاء، 18 يوليه 2007 03:34:10 م بواسطة سعيد شكرى
0 1101
إفهمينى والسلام
من مرار الجرح
بستنزف حروفى
ع الورق وتصير كلام
كل حرف فيه يقولك
قلبى يهديكى السلام
والسلام هنا مش ختام
السلام هو البداية
لجل مانحس بأمان
والأمان دلوقت غاية
والغايات شبه المحال
والمحال على أى حال
صار طبيعى ف كل شئ
حتى فى الطفل البرئ
قصدى اللى كان برئ
قبل ما ينام ع الرصيف
والرصيف مليان ديابة
والديابة دول نوعين
نوع بينهش أى حاجة
أصله محروم من سنين
أما النوع التانى منهم
فوق دراعه فى شريطين
والشرايط مش عياقة
لأ دى سلطة ومين هناك
فين بطاقتك؟
وإحتمالك ويا طاقتك
وإبتسم وإفرد قفاك
والقفا م الشمس دايب
بُص فيه هتشوف عجايب
والعجايب كانوا سبعة
قبل ما يحل السلام
فى زمان العولمة
مين يقولى صبحوا كام
بعد ما سكن الحِدا برج الحمام؟
أعذرينى يا حبيبتى
كنت ناوى أكتب كتير
أصل حبك جوه قلبى
شئ كبير
بس مش لاقى الكلام
وإنتى أمى
إفهمينى والسلام
إسم الشاعرإسم الكاتبالبلدإسم القسمالمشاهدات
سعيد شكرىسعيد شكرىمصر☆ دواوين الأعضاء .. عامِّي1101
لاتوجد تعليقات