تاريخ الاضافة
الخميس، 16 أغسطس 2007 06:36:52 ص بواسطة مصطفى ابراهيم الحلاج
0 574
صخرة الحلم الجميل
صخرة الحلم الجميل
مدد ... مدد
يا حلم جوايا أتولد
شايلين حروفك نجمتين
إحساس برئ ..
بس الطريق .
يا قلبي ده وخدك لفين
ما بين نجومها والرموش
شئ ما اعرفهوش
بيرجني ويشدني لطريق طويل
إحساس جميل
بيزغزغ القلب اللي
نايم من زمان
يرقص حنان
ويردد اللحن اللي
منسي من سنين
مليون مدد
يا حلم جوايا أتولد
من بذرة الحس القديم
عمر السنين
وف حضن بحرك يا جليم
مرسى لكل العاشقين
تقعد هناك
أجري وأقعد جنبها
تضحك أقرب منّها
ألمح نجومها منوّره
ونا جاي ف إيدي كوز دره
حباته لؤلؤ مرصوصين
أقطف وأحط ف بقها
أشبع أنا ...
أحلم بعش يضمنا
نلعب مع الموج الشقي
يرقص .. يرقّص حلمنا
تأكل عقارب وقتنا
كل الساعات
نسرق من الوقت اللي فات
طعم العسل
ونقوم نرقّص حلمنا
على لحن أنغام الرجوع
تنزل دموع
من صخرة الحلم الجميل
ودموع تسيل
على نن عين موجنا الشقي
واليوم يفوت ..
مع يوم جديد
بيشدنا لنفس المكان
نرجع قوام
نلمح خطاوي الفرحة
للموج الشقي
يا موج عجوز .. جواك سنين
شايلة حكاوي العاشقين
سجّل حكاوي قصتي
وأبقى أبتدي
تحكيها للنجمة
اللي واقفة وحدها
ساعة ما تلمح خدها
من غير ورود
ساعة ما تلمح وشها
ملفوف بتوب الحزن
وخيوط السكوت
وأعرف ساعتها إن أنا
يا موج بموت
ديوان رغم انهزام الروح
إسم الشاعرالبلدإسم القسمالمشاهدات
محمد رمضان هدايةمصر☆ شعراء العامية في العصر الحديث574