تاريخ الاضافة
الجمعة، 17 أغسطس 2007 12:23:10 ص بواسطة مصطفى ابراهيم الحلاج
0 533
نجمة ع الضفة
نجمة ع الضفة
إلى مدينة بور سعيد
قلبي حبيس القفص
على قده دقاته
شايل هموم الزمن
سابح ف أناته
وف غز برد الشتا
بينز من عرقه
نفسه النسيم العليل
يعزفله غنواته
فجأة ومن غير معاد
أختال بنسماته
من أرض فيه التراب
متحني بالمواويل
زارعه غيطان الليل
نجمة وكام قنديل
قلبي الأسير آذن
طعم النهار راجع
ونا كنت متحزم
يا دنيا بمواجع
والخطوة متبعترة
لملمت من تاني
للخطوة أقدامي
ودفنت هم الحياة
ف السكة قدامي
ومشيت أغنيلها
على ضي قنديلها
فاتح حدودي براح
ضامم مواويلها
يا نجمة متعلقة
ع الضفة يا سمره
أحلف عشان اللقا
لو سكتي جمره
ل أزحف لحد الباب
يا بور سعيد وأجي
درويش وف رحابك
حاجج متين مرة
ديوان رغم انهزام الروح
( إلى مدينة بور سعيد )
إسم الشاعرالبلدإسم القسمالمشاهدات
محمد رمضان هدايةمصر☆ شعراء العامية في العصر الحديث533