إبلاغ عن خطأ
ملحوظات عن القصيدة:
بريدك الإلكتروني - غير إلزامي - حتى نتمكن من الرد عليك
انتظر إرسال البلاغ...
|
صورة حلم |
ساعات بشوف صورة الوطن متحاوطه بالتجاعيد |
والايد من التعاقيد والكسره ساعة الطل مشقوقه |
وساعات بشوف الخلق من غير طلق مولوده |
متزوقه رغم النكد ..ومفرفشه |
بضحكه ماسخه ...مكرمشه |
مخلوقه جوه القلب ..مخنوقه |
وساعات بشوف الكرمشه |
لاهى عالجبين ولاعالايدين |
ولا بين كتاف المخلوقين |
لكن بشوفها معششه |
من بين قلوب عاشت بتنبض |
نبض اصبح يوم سجين |
ولحد فين يوم ياوطن |
هنعيش بنحلم يوم بحلم مايتحلم |
ولو اتحلم..ملعون ابو الحلم |
اللى يفضل يوم مانقدر نسمعه |
ونودعه.. لحسن نفوق ونصدقه |
ونعيش ونستنى النبؤة |
من الولد اللى اتولد |
علشان يحبل حلمنا..ويقولنا |
خدوا منى مفتاح الوطن |
لأ ياوطن |
مش هو ده نور الكفيف |
مش هو ده فجر الخريف |
مش هو ده الحلم اللى ممكن يتحلم |
مش هو ده نتاج الدراع اللى اتظلم |
ولون يوم سكت القلم |
لما انطفى فينا الكلام |
لما الحروف اتبدلت |
بكلام مانعرفلوش كلام |
لما الكلام اصبح سكوت |
لما الحياه بدأت تموت |
لما الحيتان اتجمعت |
علشان توضبلك تابوت |
وتفوت مع الايام |
احلام ماتعرف يوم بديل |
ياتعيش كده حلمك كابوس |
او حاجه تانيه مستحيل |