عناوين ونصوص القصائد   أسماء الشعراء 
الشعراء الأعضاء .. عامِّي > مصر > أبو زيد بيومي > باحب النظام

مصر

مشاهدة
1288

إعجاب
0

تعليق
0

مفضل
0

الأبيات
0
إغلاق

ملحوظات عن القصيدة:
بريدك الإلكتروني - غير إلزامي - حتى نتمكن من الرد عليك

إرسال
انتظر إرسال البلاغ...

باحب النظام

باحب النضافة واموت في النظام
وعايش حياتي غرام في غرام
عصامي ولا كلت يوم من حرام
ودا لأني دايما باحب النظام
باروح شغلي بدرى وبامضي انصراف
ولا جيت ف مرة عملت انحراف
تشوفني سكوتي مليش في الكلام
باحبه باحبه باحب النظام
أهندم هدومي و اداري الرقع
وباكتم همومي وباعمل جدع
عشان دنيا زايلة باعيشها بسلام
باحبه باحبه باحب النظام
ولا احب أشبع ولا اكو ن تخين
وباكلها طقة واجوع طقتين
عشان دنيا زايلة باعيشها بسلام
باحبه باحبه باحب النظام
وبامشي ف حالي ماكلمش حد
ودا لأني دوغري ومظبوط وجد
ولا امشي ف مظاهرة ولا ف اعتصام
باحبه باحبه باحب النظام
حمار شغل صابر ولا قلت آي
ولو حد ينده أقول أيوة جاى
واشيل اللي يركب ولي احترام
باحبه باحبه باحب النظام
باحب اللي فوقي يكون ديكتاتور
ويرضي غروري يقوللي يا تور
وانفذ بسرعة وأدي التمام
باحبه باحبه باحب النظام
ماعنديش كلام للي فوق غير نعم
ومنطوقشي لأة واكون محترم
وباخد حوافزي تمام التمام
باحبه باحبه باحب النظام
ولا احب أبدا أشوف غير لتحت
لا بصيت علالي ولا جيت ورحت
ما هاينوبني غير التعب والملام
باحبه باحبه باحب النظام
باحب العدالة مادام ملتزم
واطالب بحقي ف ضرب الجزم
واطاطي لنصيبي واعدّلّه كام
باحبه باحبه باحب النظام
بأدّي الفرايض وانا مستحي
ولا اعملشي سني ولا ملتحي
واحافظ على مبدأ الأمن عام
باحبه باحبه باحب النظام
ولا اعمل شيوعي واروح لليسار
باكبّر دماغي ولو تبقى نار
مليش دعوة غير باحترام النظام
باحبه باحبه باحب النظام
مفيش مرة خالص دخلت النيابة
خروفي مسالم ف وسط الديابة
ولو ديب ياكلني أقوله قوام
باحبه باحبه باحب النظام
أزق ف مراكبي يمكن تسير
ولا اقرا جرايد ولا احلم كتير
واشّد ف غطايا وبدري أنام
باحبه باحبه باحب النظام
مليش عمري دعوة بكلام السياسة
كلام المعارضة دا كفر ونجاسة
تقوللي كفاية أقولك حرام
باحبه باحبه باحب النظام
أبو زيد بيومي
التعديل بواسطة: أبوزيد بيومي
الإضافة: الثلاثاء 2007/09/04 01:22:00 مساءً
إعجاب
مفضلة
متابعة

أضف تعليق

يجب تسجيل الدخول أو الاشتراك أو تفعيل الحساب اذا كنت مشترك لإضافة التعليق


أعلى القصائد مشاهدة للشاعر
أعلى القصائد مشاهدة خلال 24 ساعة الماضية
انتظر معالجة القصيدة ...
جميع الحقوق محفوظة لبوابة الشعراء .. حمد الحجري © 2005 - برمجة وتصميم
info@poetsgate.com