تاريخ الاضافة
السبت، 8 سبتمبر 2007 06:00:36 ص بواسطة محمد فاروق
0 580
انسى تاريخنا
(انسى تاريخنا)
وبطولة شعبى الوهمية
فى كلام محتل بدون ثورة
ورطوبة بتنهش ابدانا
مع ان البرد ماطلش العضم
ودايما يطلع على بره
وان مره غلطنا وخدشوم فينا غشاء رجولتنا
وقطفم كل الورد الطارح (جوه القصر)
فارجع وافتح باب مقفول من عهد خرافى
وابدأحافى..وارسم فوق الرملة خطوط
وابعت صرخة فى وسط العارة بألوان دمك
وابنى بقلبك بين تفاصيل افكارنا خنادق
علشان نستر فكرة بقالها سنين عريانة
وازرع وسط فراغ ترنيمة صوتنا كيان
وانسى زمان كان عايش بنا التور الهايج
عمال يقتل فى الحملان
وانحت لينا خريطة وبين فيها ملامح بيضة
مشطوب فيها مابنا وبينك كل حدود
واقتل دود عمال بينخور جوه الشمس
علشان تقدر تلقى فى جدول بكرة مكان
والايام تحميك من ريح طواحين شغالة
وانسى سحابة بتغسل فينا بحبات سودة
وارسم توتة بضلة ونسمة وقبلة ومدنا
وامسك ايدنا ورجع فينا النبض العادى
وابنى مابين دخانتك جسر حقيقة
واسمح لينا فى كل دقيقة نقول احلامنا
وان كان فاتنا فى ليل انقاض العتمة كتاب
نور لينا النور سرداب من تحت خطانا
يمكن تخلق مهد يفك طلاسم بكره
اوفى التوهه تلاقى دليل فى سراب الصحرا
بس الاول قبل مانبدأ حلم معاك
من جواك خليك مستحمل حس صريخنا
وانسى تاريخنا...