إبلاغ عن خطأ
ملحوظات عن القصيدة:
بريدك الإلكتروني - غير إلزامي - حتى نتمكن من الرد عليك
انتظر إرسال البلاغ...
|
ياوابور الجاز |
لمحوك تايه بين الأسباب |
قالوا: دى فرصة وعملوك عكاز |
اتسندوا عليه قبل مايقعوا |
من فوق الكرسى الهزاز |
يا وابور الجاز |
يامحنى ديل العصفورة بالدم النازل على القضبان |
ليه كل البنى أدمين إنسان؟ |
مع إن فيه ناس سلمهم درجاته ضرايب |
والعتبة عليها السجان |
والضحكة من الغلا والكوا ماتت شاردة |
مع إن السادة إخوانا البعدا |
ضحكتهم بنسد تمنها |
والسلم نايلو ف نايلو اللهم احفظهم |
والعتبة جزاز!!! |
ياوابور الجاز |
مين الغلطان؟ |
الشخص اللى يدوبك بيلقى تمن اللقمة |
ولاّ العايش ف تبات ونبات |
ولاّ احنا صحيح زى ما قالوا |
ما بنعرفشى نركب قطارات؟! |
وهأقولك إيه؟ |
ما الغلطة الأولى بتعدى |
والثانية كمان |
لكن التالتة دايماً تابتة |
وهتعمل إيه لمواطن م الدرجة التالتة |
الفقر رماه على كرسى خشب |
أو واقف مزنوق بين القاعدين |
فى الدرجة المنوحوسة التالتة |
وف لحظة وابور الجاز ولّع فيها واتنيل مات |
وسبع مجاميع ف العربيات |
ما التعلب فات |
وف ديله سحب شلة أموات |
وشالوا لنا غفير |
وجابولنا غفير |
ما هو قطر وأيامنا محطة وْ ... |
حطة يا بطة .. يا دقن القطة |
جالنا أونطة .. وراح ف الغلطة |
وبكرة نجيبه المجلس نعمله استجواب |
وادى دقنى أهه! |
لو نعرف مين الكداب!! |
والله يرحم عبد الوهّاب! |
: يا وابور قولى رايح على فين؟ |
ما كتبنا العَقد |
للبس العُقد |
لمدة عِقد وفات عقدين |
واهو يوم فى السما |
واتنين ف الأرض |
وربك يعلم رايحين فين |