تاريخ الاضافة
الخميس، 13 سبتمبر 2007 09:37:13 م بواسطة د. إكرامي قورة
0 1180
خمسين سنة
خمسين سنة
يا بو قلب أخضر والقصيدة فيه بتطرح سوسنة
عقبال كمان خمسين سنة
تفضل كده ماسك كمان
حاجز مكان
على شط بحر الشعر تعزف للقلوب الطاهرة أجمل دندنة
أما أنا
وأنا باقرا شعرك ده بيدخل للكيان ويشدني
مني ويرميني على رمل البحور الممكنة
معرفش ليه بتهزني
رعشة سعادة حنينة
وألقاك هناك
فارد شراعك للمدى
والريح مطاوعة مركبك
وكأن ربك ركبك
قارب هدى
بتحط إيدك ع الجراح تبرد
وتلقى وقتها الفرح ابتدا
و"عيون بهية" تندهك
فتقوم وتبعت للوطن مليون ندا
غرقت قلوعي في بحارك يا وطن
تايه "زمان العولمة"
وانت السكن
اديني ودنك لحظتين
نرجع معا
دا انا كنت باصرخ من زمان
وأقول " أعرني مسمعا )
..
نادي عليه لازم في مرة هيسمعك
نادي بهية يا ياسين
نادى عينيها الطيبين
هتمد كف حنينة
ولحضنها
هترجعك
مهداة للدكتور جمال مرسي
إسم الشاعرالبلدإسم القسمالمشاهدات
إكرامي قورةمصر☆ شعراء العامية في العصر الحديث1180