تاريخ الاضافة
الثلاثاء، 18 سبتمبر 2007 09:13:32 م بواسطة د. إكرامي قورة
0 1322
باحس إني باضيع مني
(باحس إنى باتوه وياك )
قالتها .. وضعت انا منّى
وزادت سكتى أشواك
وكان ردى .. وإيه يعنى !
قصايدى لما باشرحها
يقولوا إنها إنتِ
وعينك لما بالمحها
يزوّد سحرها صمتى
غرامــك داب ف تكــوينى
ونــار بُعــدك بتكــوينى
ولو قرّبت من عينى
باحس انى باضيع منى
بحبك ؟ .. أه ما بنكرشى
واغير منّى على عيونك
هاغطيكِ أنا برمشى
واعيش بالحب مجنونك
عيونك غيروا حالى
صحاب حلّى وترحالى
ليلاتى يدوبوا فيّا
وخلّوا الحب موالى
يــانورعينى .. وروح روحـى
طبيــبى إنتِ وجــروحــى
ويوم بالحب ما تبوحى
هاضيع يا منيتى منـّى
دا لو كان البعاد قدرى
وأكون وحدى أنا بكره
يزيد من دمعتى صبرى
واعيش عمرى على الذكرى
ومهما الدنيا تبعدنا
وتبعد فى خطاوينا
هاعيش عمرى على عهودنا
وأحلامنا وأمانينا
ولــو دارت بنـا الأفـلاك
هتفضــل غنوتــك لحــنى
( باحس انى باتوه وياك )
واحس إنى باضيـع منى
إسم الشاعرالبلدإسم القسمالمشاهدات
إكرامي قورةمصر☆ شعراء العامية في العصر الحديث1322