إبلاغ عن خطأ
ملحوظات عن القصيدة:
بريدك الإلكتروني - غير إلزامي - حتى نتمكن من الرد عليك
انتظر إرسال البلاغ...
|
عم حسين |
ستار الليل على الشارع
|
وشاح غامق ... وعم حسين على الدكة |
يناجي الروح بصوت مكتوم .. |
ونور السكة والشبابيك تقولش خروم على منديل من الضلمة .. |
وعم حسين على الدكة ... بيحسبها ... |
مولع ... والسجارة تزوم ... ... |
مابين الشفة والشفة .. |
ويشفط منها شفطة .. تقول عطشان؟ تقولشي جعان؟ |
ويبلع همه ف الدخان ... يكح ويطرد البلغم .. |
ونور السكة والشبابيك بيعكس دمعة المجروح |
يداريها .. يخاف لتشوفه أي عيون بيتقطع . |
وناس نازلة وناس طالعة.. |
دا انا النازل وشايف كلهم طالعين |
مساء الخير يا عم حسين |
وعم حسين على الدكة بيحسبها |
وآدي الخمسة في الستة |
وآدي الغالية ست البيت |
تقول لله دوا الروماتزم للرجلين |
ومروا سنين .. وهيا بتمسح السلم |
وكانت شابة ملفوفة .. لخدمة جوزها ملهوفة .. |
وتلقا الفرحة والدنيا بتفتح بابها للأتنين |
وسابو الزرع سابو الطين |
وشالو الدين على كتافهم |
وقالوا نلمو ونعاود ... |
وطالت غربة الأيام ... مابين الشغل والخلفة |
بقم ستة ...ولاد اتنين مع البنتين ... بقم عزوة |
وفوق السطح يتلموا ويتحكوا ويتخانقوا ...وعند الليل بيتحشروا |
في اوضة .. كبس زي الحبس مافيها عفش ولا شبابيك .. |
ونور السكة والشبابيك |
تقولش خروم على منديل من الضلمة ... |
وعم حسين على الدكة ... بيحسبها .. |
وآدي الخمسة في الستة .. |
وبركة ميه قدامه ... وناس فايته ..ف عربيات أخر موضة |
تمر بسرعة وتطرطش .. |
مساء الخير يا عم حسين .. وميردش .......... تقولشي أطرش؟ |
ومش عادته يكون مهموم على السكان |
أوامر البيه ... عينيا يا ست .. ..وأنا حاضر ولا يهمك.. وكن .. فيكون . |
دي ناس لها أصل؟ أوميزة؟ |
تمر عليك .. ولا تراعي دي ناس ناقصة ما بتحسش |
ويسرح فكره ويعاود مع القطر اللي جابو زماااااااااااااان |
.. يروح للحب والطيبة .. لأصل الناس والجيرة .. |
بيناتهم ود ما يدوبشي ولا تحسش معاهم غربة أو حيرة |
سلام يا حسين وخد بالك من الغالية |
واوعا لا تاكلك الغربة وتنسى |
الأهل والجوابات |
وكان فرحان .. وكان قلقان .. وكان خايف ... وكان سالف ... |
وكان يحلم يلم الدين مع القرشين ويعاود |
وتاهت خطوته وطالت ..في أرض الهيصة والزحمة |
مابين حلمه بلقمة تكفي وتوفي ويحمد ربنا عليها .. |
شوية فول وطعمية وحبة مش مكوية بشطة تولع الجته |
وياما النفس كات تاخده تهف عليه ... |
لأكلة بحر مشوية .. لفرخة بضارة أو لحمه ... |
وبين حلمه يعود مجبور. |
وساب الأهل والخلان .. وغابت فرحة اللمة .. |
لا لم الدين ...ولا القرشين بيستنوا |
فلوس دي يا صاحبي واللا هاموش؟ |
ميتا يجولك وتمسكهم تطير علطول |
وليلي يطول ... وهم البنت ويا الواد |
جبال ع الراس ..مدارس .. لبس .. أو كراس .. |
وليلة عيد .. وعيل دمعته في حضنه لغاية الصبح ... |
يعمل ايه؟ .. وهو أكيد .. كرامته تقيد في جوفه النار ... |
ميطلعشي ع السكة يقول لله ولا يمدش ايديه لحرام ... |
************** |
وناس داخلة وناس طالعة |
مساء الخير يا عم حسين: ما بيردش .. ماهوش سامع |
ونور السكة والشبابيك |
تقولش خروم على منديل من الضلمة ... |
وعم حسين على الدكة بيحسبها |
وقال البنت جالها عريس .. وكان يوم الخطوبة خميس .. |
وكانت ليلة الأحزان وناس ملخومة في الشربات |
وهو على الهموم بيبات |
ومحمد دا بكري أبوه ... خد الدبلوم وحفيت ع الطريق رجليه |
عشان الشغل ... قالوا واسطة .... فراح للبيه ... |
وقف بالباب ما ردوا عليه ... سابوه ملطوع ..دا أبوه بواب!!!! |
وبعدين ايه؟ صرخ من ذله قال ده عذاب ... وفاض بكلام وف الممنوع .. |
فقاموا خدوه وفين يوجع ... |
طلع ممسوخ ...وغابت ضحكته في عينيه |
كتم حبه .. خنق حلمه ... |
وربا الدقن وتشوفه .. على السكة .. عجوز .. محني .. |
وماسك سبحته في ايديه |
وتنزل دمعته حبة ورا حبة في خيط السبحة |
والأوراد .. لا بتعالج فساد الكون .. |
ولا بتقتل جيوش النهب و المماليك . |
وقبضوا عليه .. وقر بأنه ارهابي . |
. وكاره أم دي الدنيا وكفر كل من فيها |
وقالوا زعيم وقالوا خطير ... سنين مرت ولا شافوا .. |
وشال الحزن دا لوحده على كتافه |
وهل ممكن يروح يسأل |
ويطمن .. دا برضو ضناه ...؟ |
وراح يسأل ومخلصشي |
وكانت ليلة .. ولا يمكن تصدقها عقول شياطين |
يهز دماغه عم حسين و يتنهد .. |
بلاش نفتحها دي السيرة ... |
أأقولك ايه؟ ديابة بتاكل الأحلام؟ |
أقول ده حاميها حراميها؟ ... |
ما ينفع نفخ في المقطوع ..بقولك ايه؟ ما تيجي نغير الموضوع؟ |
وهم برضو أمان لينا بيحمونا |
نجوع ما نجوع .. نلاقي الهدمة ما نلاقي |
ندوق الذل والتعذيب .. نعاني القهر والتهليب .. اهي بلادنا ... وفين هنروح؟ |
ورب الكون مسيره ف يوم حيفرجها .. |
***************** |
... ستا رة الليل على الشارع ...وشاح مهموم |
ونور السكة والشبابيك تقولش خروم |
وعم حسين على الدكة بيحسبها |
وآدي البيضة وادي الكتكوت |
يشد سجارته جوه القلب يشربها هموم تكوي لحد الموت |
وناس راحة وناس جايا |
مساء الخير يا عم حسين ... ما بيردش . |
ونور السكة والشبابيك .. تقولش دموع على منديل من الضلمة ... |
وعم حسين على الدكة ....حسبها كتير ..ضربها كتير ... قسمها كتير |
ولا طالشي من الحسبة غير المقسوم |
لا لم الدين ولا القرشين وعدا القطر ملحقهوش ...ولا رجعشي.:. |