عناوين ونصوص القصائد   أسماء الشعراء 
الشعراء الأعضاء .. عامِّي > مصر > محمد نديم > انا برجوك تشوف وشك

مصر

مشاهدة
776

إعجاب
0

تعليق
0

مفضل
0

الأبيات
0
إغلاق

ملحوظات عن القصيدة:
بريدك الإلكتروني - غير إلزامي - حتى نتمكن من الرد عليك

إرسال
انتظر إرسال البلاغ...

انا برجوك تشوف وشك

انا برجوك تشوف وشك.
بقلب حزين بيتقطع
أنا قاعد على الدكة ف نص الليل
مولع والسيجارة تزوم ما بين الشفة والشفة
يجبني الفكر ويودي
بقى معقول؟
وبالذمة ودا اسمه كلام؟
وفين عايشين؟
ف دنيا وألا دي غابة؟
نشد العزم ونفكر
نعاني الهم والأحزان ونشربها
نعيش الكلمة بالإحساس ونكتبها
ونمشي بزهرة الأبداع
نوزعها
هدايا الود بين الناس
رويناها بدم القلب والغربة
ونتفاجئ بمين يلطش شقى غيره
وينشرها
ولا يحسش بنبضة عيب تقوللو حرام
ولا يخشى لرب الكون عيون ما تنام
بتمهل آه لكن ما تقولشي دي بتهمل
بتدي الحق لصحابه
وقلبي حزين
ونور السكة والشبابيك كأنه دموع على منديل من الضلمة
وانا واقف على بابو
عظيم رحمن
ولا يظلم
يارب الكون انا بشكي عبادك ليك
دا اسم جميل ومعرفهوش ولا شفتوش
لكني ف قلبي من جوة بكن للو احترام انسان
لكن ليه يا بني تنشر اسمك الراقي
وكأنه فاضي من الأخلاق
دا اسم جميل ماليش ابدا عليه فيتو
بيسرق اهله وبيخدع شرف بيته.
وبيمشي ف الواطي؟
و. يسرق الكلمة بلا وازع؟
وزيف الكدب يملا عينيه
ستارة الليل على السكة
وشاح مخروم من الضلمة
وكدبك ريح عفن مسموم
تمر تزوم على الشبابيك
وانا قاعد على الدكة
يجيبني الفكر ويودي
وتسرق مني عم حسين؟
دا كان عمي!!!!!
وليلة لما عدا القطر تنسبها لقلم فاضي
وفكر بليد ...وراس فاضية على كتافك؟
صعبت عليا بالتأكيد
لأنك عاجز الكلمة
مريض القلب
حتلاقي الجزاء جايلك قدر محتوم
وماشي معاك ولا تدرى
ما بين رجليك
وتحت ايديك
في روحك ....في الضمير جواك
وفوق السكة تمشيها وجوا القطر والأتوبيس
في حلمك تيجي نص الليل وشوش
سودا وتحت مخدة الكوابيس
ف لقمة عيشك المره ..في دمك يجري وعروقك
جزاء عادل ..
يجيك طاير على السكة
ونور الحق يقضي عليك
لازم تفهم قناع الزيف ما بيدومشي
ومين دا العاقل الموزون
يصدق ان وش الشمع تحت الشمس ما يدوبشي؟
حرام تسرق عيال غيرك
ولما تكون عقيم عاجز ..تفك الخط
مش قادر تشوف السكة او تمشي
في درب الفن ... ليه تكدب؟
ما كنت تعيش ف غيبوبتك
سراب يمشي ما بين
الغز* والصعاليك
وشوف يا بني حقولك كلمة وافهمها
وشوف الحق من قبل الزمان بزمان
بيعمل ايه ولو طالت لشر سنين
بييجي النور
ولا يخليش على السكة وشاح الزيف من الضلمة
خلاص يا بني انا مسامحك
مسامح مش لأني ضعيف
...لأني كبير
وبعرف إن دي الكلمة
بلون دمي ومن نبضي
وواثق من جذور فني
عرفت الدرس وفهمته؟
وخفت الله وما خدعتوش؟
أكيد لازم ف يوم ترجع ..عشان يابني تكون إنسان
ياريت يا بني تكون إنسان
عشان تقدر تقول لابنك
ف مرة عيب!!!!
وتفضل قدوة جوا عينيه
انا برجوك تشوف وشك
يوماتي الصبح في مراية الصلاة والصوم
وليلاتي تشوف دمعة نيران ندمك
في نص الليل
انا برجوك تشوف المصحف الطاهر
وتتعلم في نور الحق والكلمة ..
وإوعى تظن إني ضعيف
وحاذر من دعاء مظلوم في نص الليل ونور الحق بيرتل على الشبابيك
كلام الحق في القران
ولا يسرق كلام الناس
وعند القوة يحمي الكلمة
والأشعار يخليها نيران تحرق جيوش الكذب والمماليك
خلاص يا بني أنا مسامحك
أكيد يا بني تكون إنسان .. لازم ترجع تكون انسان
ولازم تفهم الفولة *
دي دنيا ضحكها ... دمعة
دي دنيا سعدها أحزان
دي دنيا وشها ... خدعة
أكيد حنموت .. وقبري وقبرك الضلمة
ونور الحق حينور حوالينا بصدق القلب والنية.
أكيد يا بني لازم ترجع ...
وتقرا الدرس بعناية عشان تفهم ..تكون إنسان.
ومش إبليس ... قريت الدرس مفهمتوش
محمد نديم

إلى من سرق أشعاري ونشرها باسمه على شبكة المعلوماتية دون وازع من ضمير او خوف من الله.
بواسطة
المشرف العام
الإضافة: الأحد 2007/10/14 03:39:54 مساءً
التعديل: الجمعة 2022/09/02 12:37:27 صباحاً
إعجاب
مفضلة
متابعة

أضف تعليق

يجب تسجيل الدخول أو الاشتراك أو تفعيل الحساب اذا كنت مشترك لإضافة التعليق


أعلى القصائد مشاهدة للشاعر
أعلى القصائد مشاهدة خلال 24 ساعة الماضية
انتظر معالجة القصيدة ...
جميع الحقوق محفوظة لبوابة الشعراء .. حمد الحجري © 2005 - برمجة وتصميم
info@poetsgate.com