عناوين ونصوص القصائد   أسماء الشعراء 
الشعراء الأعضاء .. عامِّي > مصر > محمد نديم > حلم ليلة وطن

مصر

مشاهدة
835

إعجاب
0

تعليق
0

مفضل
0

الأبيات
0
إغلاق

ملحوظات عن القصيدة:
بريدك الإلكتروني - غير إلزامي - حتى نتمكن من الرد عليك

إرسال
انتظر إرسال البلاغ...

حلم ليلة وطن

أسوان يوليو
لم انسألت عليه
إيه الوطن يا صديق؟
قلت الوطن كلمة.
مجنون بحب الوطن
اهدي الوطن ...كلمة ...
وبسيطة من حرفين.
في الدم تحييني.
نبضة ف عروق القلب.
جوة الضمير لؤلؤة.....
تضوي في نور العين.
لو علقوا المشنقة ...ف الليل لأشعاري
أو ولعوا المحرقة
للقصة والأوراق
برضك بحب الوطن
وحقول أنا مشتاق ..
للأهل والخلان ... والسهرة واللمة
والحلوة تتعايق ... والزحمة والبهدلة
والناس بتتخانق
والفرحة يوم فرحنا ... والدمعة تنزل مطر
لو مرة خاب بختنا
وبحب فيك أهلنا
بالخبث والطيبة
والود من أصحاب
والحب من جاره.
مجنون بحب الوطن ..
والأرض والطينة
ساقية تبوس النيل
يهديها أسرارو
ترجع بفرحة عيد
تسقي الغيطان مواويل
تطرح على الشطين
بالقمح والأزهار.
وتغني أشجاره
مجنون بحب الوطن
مشتاق لحب زمان
وحشاني نظرتها
واللمسة من ايدها
مش ناسي ضحكتها
كانت تهل بعيد ...تسبقها خطوتها
يبعت نسيم الصيف ... ريحة ضفايرها
دي حبيبتي في الكتاب
اشارات من الشباك ....وجواب في نص كتاب
ومقابلة مجنونة ... في جنينة مطرفة
أو تحت بير سلم
بالحب والجدعنة يحفظها جوا عينيه
ربك حليم ستار وبسرنا أعلم
عصفورة بين عصافير ...من أجمل الأطيار
طارت ولا شفتها ...
من يوم ما حط غراب ... على غصن من عشها
خدها وراح لبعيد
بصيت على العصافير ...ف جنينة الأحلام
ملقتش غير الصمت ... في العش والتعابين
ولقيت طيورالحب ...من عشهم طاروا.
مجنون بحب الوطن ...مشتاق لست الدار ...
ودي ستي أو ستك
أم النفس والذوق ...في طبيخها متعتق
صابرة وبنت اصول ...ساكتة ولا تشكيش
في العتمة ما تهتز ..عارفة الطريق حفظاه
والحب عنوانها
لما الحبيب يقسى ...أو حد يطعنها …
أو كلمة متسممة ...تقصد تزعلها ..
يمكن تعيط أه ...يمكن كمان تلطم
لكن دي حافظة الدرس
من فات قديمو تاه.
والأهل دول عزوة ...من ساب أمان الدار
يتقل مقدارو
لكن تشد الحيل ...وتلف دي الطرحة
تمسح دموع الليل وتقوم من النجمة
وتطوف على الأوليا ..
.تدعي هناك وتشيل ..من راسها كل الهم
وتجود بشكوتها ...في مقام لأهل البيت
ويا سعد من زارو.
مجنون بحب الوطن
في الغربة مرمي هناك
ودا مش هروب مني… دا الرزق له أحكام
وحقولها م الآخر
ربك عليم ستار …. و الناس ليها الظاهر
.وأدينا ف التفكير ...والسعي في المسافات
لكن اله الكون ..قادر يدبرها
بشتاق لصوت الوطن
واستنى أخباره
الغربة فيها المال دي حقيقة مش بنكر
والعز والفخفخة ... والفقر يتاخر.
لكن هدوء البال والحب في اللمة
والقيمة بين الناس بالأصل ف الإنسان
خليك وغوص في المال
ده لحد ما يغرقك
بجنون مالوش آخر.
مجنون بحب الوطن ..
والحالة ما تسرش
وبقوللو قوم يا وطن
من النومة في الكوابيس
طلع شموس الحق
من غيمة الأحزان
ونصد ونقول لأ
للغز والمماليك
نقتل وحوش الخوف
نحلم ف عز الضهر
ونعدي بالأحلام آخر حدود الشوف.
ونهد سجن الروح والعتمة والمتاريس.
مجنون بحب الوطن
اهدي الوطن ...كلمة ...وبسيطة من حرفين.
في الدم تحييني.
نبضة ف عروق القلب
أصل الوطن كلمة
والكلمة هي ... الحب
بهديك يا كل العمر من زهرة الأشعار
...بهديك يا وطني حب
محمد نديم
بواسطة
المشرف العام
الإضافة: الأحد 2007/10/14 04:07:00 مساءً
التعديل: الجمعة 2022/09/02 12:36:54 صباحاً
إعجاب
مفضلة
متابعة

أضف تعليق

يجب تسجيل الدخول أو الاشتراك أو تفعيل الحساب اذا كنت مشترك لإضافة التعليق


أعلى القصائد مشاهدة للشاعر
أعلى القصائد مشاهدة خلال 24 ساعة الماضية
انتظر معالجة القصيدة ...
جميع الحقوق محفوظة لبوابة الشعراء .. حمد الحجري © 2005 - برمجة وتصميم
info@poetsgate.com