عناوين ونصوص القصائد   أسماء الشعراء 
الشعراء الأعضاء .. عامِّي > السودان > إيهاب الأمين > المهبوشة

السودان

مشاهدة
906

إعجاب
0

تعليق
0

مفضل
0

الأبيات
0
إغلاق

ملحوظات عن القصيدة:

إرسال
انتظر إرسال البلاغ...

المهبوشة

:...
ها مهبوشة
ترازي تزازي في ها دي الفنقة
ها مربوشة
تشري الغيم وتفوتي
تزرعي لينا غنيوة ريدك
شدرة منقة
ما ظنيتك هشتي ودشتي
وشلتي كلامك
بيهو ضربت الكلمة الجاتك
وكت الزنقة
تبدا تقرقر منك ضحكة
تقرقر بطن الواطة
وتمرق شدرة
تخلي الحال الواقف يقعد
خطوة وخطوة
يعود الحنّ وأنّ وغنى
حبيبة قلبو تشيلا الموجة
وعشم العاشق
عشم إبليس الداير الجنة
ها مهبوشة
مكان ما فتنا ووين ما كنا
ما لاقانا ولا صادفنا
دغشاً بحرق زي نار دغشك
سجم الخلا حريقو وفاتك
يوم الحبل الرابط حلّ
يوم ما جونا أولاد الحلة
عديل في وجهة درب الغيمة
عديل ضُلالة ونجمة وخيمة
وكنت براك في وسط الشلة
وكت صنقرتي
الجبل الواقف صنقر
كان يتلفت
عاين ودنقر
حت ما عاين
ما لاقالو وشيشاً غيرك
يشيلو ويقيلو...ويلولي مقيلو
ويقطع وش المطر الأسود
يقطع وش المطر الأسود!!
كان المطر الأسود حوّد
كان الفجر الناير دردق
بي قدامو الليل الهوّد
كان آ بنية عديلك عوّد
كان زغرودة خيرك دوّت
ها مهبوشة
ها تريانة تدفي عشوشا
ها فردوس بالخير مفروشة
مال الزمن الجاير غمتك
كسّر فيك جنحات الطلقة وعمتك
ها دفاية المات بالقرة
فرهدي حلماً يوصل بكرة
يراشي الناس الفقدوا البسمة
وطيبة الروح في حلو الكلمة
يا ستار من ها دي القسمة
يا مرسال الشفقة تهوّن
كلمة شفقة تشبّع جايع
ياتو كلام الشبع جايع
ياتو كلام الصلب أولادك
فوق خشبات العشم الضايع
كنا نشيلو سكاتك حكمة
كنا نشيلو سكاتك حلمة
يا ستار من ها دي القسمة
محناً شتى
تحاصر صيف الريد الشت
ها مهبوشة
زمنك غلبك حلبك
ضرعاً يشبع يرتع يمتع
ودايماً يجود
صبحك شدّ رحالو وبعّد
أريتو يعود
يقشقش ليك الدمع الهتف
ويفتح ليك كم باب مسدود
شان ما تلهلب تاني الضحكة
ونار الفرح البقى هبود
ها مهبوشة
إيهاب الأمين
التعديل بواسطة: إيهاب الأمين
الإضافة: الأربعاء 2007/10/17 11:00:08 مساءً
إعجاب
مفضلة
متابعة

أضف تعليق

يجب تسجيل الدخول أو الاشتراك أو تفعيل الحساب اذا كنت مشترك لإضافة التعليق


أعلى القصائد مشاهدة للشاعر
أعلى القصائد مشاهدة خلال 24 ساعة الماضية
انتظر معالجة القصيدة ...
جميع الحقوق محفوظة لبوابة الشعراء .. حمد الحجري © 2005 - برمجة وتصميم
info@poetsgate.com