تاريخ الاضافة
السبت، 1 ديسمبر 2007 09:03:58 م بواسطة عصام رجب حسين
0 1147
رؤيه ف عيون البنت الفرعونيه
رؤيه ف عيون البنت الفرعونيه
- م -
مرت
من بين الجلد وبين أوردة الجرح
عزفت
ع الوتر النازف حزن
ف قلب الشق
غنت
بعيونها النيلي لقلبى
أحلى قصيدة شعر
ف ... رق
مالت بالبشره القمحى
والشعر المضفر بهموم البنت البدائيه
والراسم فيا
كل ملامحى
لم يقدر قلبى إنه يدارى
أو ينطق كلمة لأ
ف …دق
....
- ن -
ناعسه
النيل نساى
لم يذكر مره الولد
الشارب منه الصبر
والرافض
فيكى الرايه المرفوعه
على آخر دور
كما لو كانت نصر
والمتوضى
بجوع اخواته
ومصلى
فوق كوبرى الجامعه
الفجر
لاجل مايلحق
يحجز ليكى
مكان
فى الدرس
كان يرسم قلب
على الكراس
ويدخل من بين القلب
السهم
وينز حروف
ال ( E ) وال ( M )
ويخبى مشاعره
لما اصحابه عليه
تـــتلم
بس عيونه
كانت كاشفه
انه فى حبك
لسه بيحبى
لما اصحابه جابولك كارت
فى عيد الأم
وهوه جايب لك
من إحساسه
نص رغيف ..
وقصيدة هم
ناعسه
عمر الإسم ماكان مشكلتى
أنا شايف فيكى معانى
أهم
مدى إيديكى يكونوا
ضفافى
وكونى لقلبى
الحضن الدافى
لاجل ماينسى الولد
العاشق فيكى
عبير الطمى
إن النيل نساى
.........
- ا -
ابريل
كان شهر الكدب
ومارس
أجمل شهر يكون للحب
دلوقتى الحال اتغير
ابريل
بيجمع بين قلبين
وال ( حمل ) التايه
بين ابراج الحظ
ودايخ على محبوبه
لقاه
جواه
ياااااااااااااااااه
كان الفرق مابينى وبينك
ست ايام
والمولى زمان
خلق الدنيا ف ست ايام
يعنى الفرق مابينى وبينك
كان دنيا
دلوقتى الحال اتغير
والفرق مابينا
اصبح ثانيه
بتمر
من بين الجلد
وبين أوردة الجرح
تعزف
ع الوتر النازف حزن
ف قلب الشق
وتنكس فيكى
الرايه المرفوعه
على اخر دور
فوق كوبرى الجامعه
من غير حق
وتطير
فتدمر برجين العقل
المستهبل
كل كراسى
الوطن القاسى
على ولاده
من أول لحظة طلق
تتغير
كل معالم نهر النيل
تتوحد فينا مشاعر
كانت تايهه
مابين الآهه
وبين ال لأ
.......
- س -
ساعة الجامعه
لما يتجمع تحت جناحها الطلبه
تحن
فتلم تروسها
وتضم العاشق
بالمعشوق
وبكل الشوق .. بترن
( تن ..
تن ..
تن )
تن
تنساه اللحظه
وتنهيدة عشق
تمد إيديها
وتخرج
من حنجرة الولد
إل لابس كل هموم البيت/
واخواته الرضع
لما يقرصهم برد الجوع
فتئن
تن
تنده له البنت
الواخد منها
( توت عنخ آمون )
كل ملامحه
والواخد من بشرتها
الصبح الوردى
لاجل مايصبح وردى
.. الإذن
تنده له البنت
فيرسم فى الخطوه مابينه وبينها
الحلم
تسأله ع الساعه
يبص لساعة الجامعه
تلمح فى عيونه الدمعه
فتقول ( أنا آسفه ) ...
وتستأذن
تن
تنشق الأرض
وتبلع منه وبيه الحسره
وكان يتمنى
لوتبلع
كل معانى الخوف والفقر
لكن
مسكين الولد
الفاكر إن
الحب يضيع بالخوف والفقر
وبينسى إن
الحب لا يعرف خوف
ولا فقر
ولا حتى بيعرف
سن
تن ...
تن ...
تن
............
- أ -
أيوب
مغلوب على أمره
كان فاكر إن
ألوان الطيف
بتكون صورة العشق
ف قلب الولد الراسم
كل مشاكله
ف شارع منشية التحرير
جوه اللوحه
أيوب مغلوب
لم ينزل مره ميدان رمسيس
لاجل يشوف
فى عيون الناس التايهه
احاسيس
مجروحه
لم يعرف إن العتبه الخضرا
لون دستورها اتغير
وان الوان الطيف
بتشكل لون الحزن
فى ورق التوت
ع البنت
اللى ماعادت ترجع
بنت بنوت
أيوب مكسور
متأكد إن الدور
ح يمر علينا
من سابع أرض
لأخر دور
........
- ل -
لو تفهم مره
البنت السمرا
إن الشاعر
لاجل قصيده
مش ممكن يدخل
أى مغامره
لو تعرف مره
بهيه
إن الفرض السادس
.. هيه
وان الولد الجاى
بمشاعر متوضيه
وشايل هم حارتنا
معاه
خارجه تشق
سكون الليل
من قلبه
.. الآه
وان البذره
اللى بتنبت شوق
جواه
لوياه
لو.... يااااااه
.......
- م -
مصلوب ع البر
والجرح بينزف
مر
ولا كان بيبوح
لطيور النورس
لما تعدى عليه
بالسر
فتواسى ف جرحه الصبر
وتطير
تنقل إحساسه
لكل طيور البحر
كان يضرب
بعصاية جرحه البحر
فينشق
وتخرج منه عروسه
أن كلم ربك ياموسى
لم تخرج من قلبه
الكلمه المحبوسه
إلا لربه
وعروسة البحر
الساكنه عيون الولد
التايه حلمه
فى ميدان رمسيس
كان عارف موج البحر
إنها
بت
حب
به
.....
- أ -
إعلام مجنون
وقلوب شفافه
وفرع لمون
كان ورد النيل
بيميل
ويوشوش خد البنت
الساكنه ف مبنى التليفزيون
إن الولد الرافض
أن يذكر اسمه
فى
( ما يطلبه المستمعون )
مستنى ف مره
تقول له
... كن
فيكون
....
إسم الشاعرإسم الكاتبالبلدإسم القسمالمشاهدات
عصام رجب حسينعصام رجب حسينمصر☆ دواوين الأعضاء .. عامِّي1147
لاتوجد تعليقات