تاريخ الاضافة
السبت، 1 ديسمبر 2007 09:12:09 م بواسطة عصام رجب حسين
0 1265
كرباج وطن
كرباج وطن
أتلو علينا ما تيسر من سورة الإسراء
واختم بسورةالضحى
و أبدأ بـمريم صفية ربها العذراء
مين فيكو داق طعم الصور ؟
مين فيها داء؟
و تلت صور متعلقين فوق الممر ..
وانا قلبي ... مــــــــــر
ومخبى حرف الصاد .. من الصياد
والحرف طعمه ف حلقي ... مر
يا شعب دايساك ...الصور
جازف... و مر
و ارسم بايدك مرة صورة
ساعتها بس ح تبقى... حر
...............
لساك يا طير
بتوشوش الجرح القديم
وتضفر الصفصاف ف شعر العيله
و ترافق الحلم
ف حزام المريلة
و يسيل غناك ع الضفتين
يتجمع الأصحاب حواليا
ابن اسما عين و ابن الدسوقى
ويسرى جاب الشيخ حسين
و طه سارح و سطنا مليان أنين
حاضنين جوابات الغرام
إل كنت باكتبها
لهذا المنتمى ..
مكتوب على خد السما ...
أنا مش بحبك
إنما ..
أنا بعشق الأرض اللي حاضنه خطوتك
و باعشق الألم - الرصاص-
لما يزغرد صوته فوق صدري
طعمه / ولا تعريجة
الكرباج على ظهر الفرس
و أنا جارر الحنطور
و مغمى عيني من الألم
ومن الصور
ومن الزمن
خمسين سنة
و رجعت شايل م الوطن
خمسين وطن
و تلت صور
............
لمي كلابك يا حبيبة الكل
دى الهدمة انهرت
بس الرقم محفور على صدري
وشابك حرفك الممنوع
ف سقف الحلق
ومعلق قصايدى
صادري قصايدى
وحددي فيا الإقامة
صادري على صدري العلامة
أو صادري آخر حلم ليا
وتانى صوره اكسريها ف فرح عيدك
برضه جوه العين نشيدك
لو تقطعي من الكتف ايد
تطرح بدالها ألف إيد
يبقوا عبيدك
لو تعمى عيني ح يعرفوني
من الرقم ..
من بدلة زرقا ..
م الألم راح يعرفوني
و يقولوا
كان شاعر ... أناني
بيحب فيها
كل شئ
و ماسبش شئ
لحد تانى
..................
لا كنت أنا
ساعة زيارة الأولياء ناوى أتوب
ولا كان دعاك بيستجاب
وقت انفلات الصبح من حضن الذنوب
من غير ما تتوضى
و النيل
بيمسح جزمته بقماشه أمريكي
و يدوسها ويعدى
ويعيد غنا نجم وامام
( لو علقوا لى مشنقه )
و ( الممنوعات )
( يما مواويل الهوى ) ( مر الكلام )
و أنا لسه خيل تحت الصور
جارر في حنطورك
خايف عليك م اللي جاى
قرب خلاص دورك ..
.............
مكتوب على سجن القناطر للنساء
الوحدة خير من جليس السوء
ياللى انت تالت في الصور
صحــصح وفــــــــــــوق
ماعدش ينفعنا فاروق
......
يا طير
ملامح غربتك
بتشكل العيل في رحم الأمهات
فبيتولد ف عيونه تأشيرة سكات
صوت السكات صحي الجماجم م القبور
و اقفين طابور
عملوا انتفاضة ميتين
راسمين حدود ( مستوطنة )على كفهم
من ضعفهم
......
اتكلمى ..
فكي ضفايرك و احلمى
و اتمشى في عروقي اللي دبلت
لا جل تطلع للنهار
فاتغربت
رديها لتراب الوطن ....
- صوت -
مكتوب علي خد السما
إنك تعيش من غير وطن
ويموت ربيعك ع الشجر
يبقى خريف حكم الصور
وتموت حروفك في الورق
من غير تمن
وانك ياصاحبى تندفن
من غير ... كــفــــن .
....
إسم الشاعرإسم الكاتبالبلدإسم القسمالمشاهدات
عصام رجب حسينعصام رجب حسينمصر☆ دواوين الأعضاء .. عامِّي1265
لاتوجد تعليقات