تاريخ الاضافة
السبت، 1 ديسمبر 2007 09:30:32 م بواسطة عصام رجب حسين
0 1059
ماشيين
ماشيين
ماشيين
لابسين أيامنا الحلوه
وقميص عبدالناصر
تحت ليالينا
العرقانه بملح وذل
بـتـدوس الخطوه
ف كرامتنا
ومن شهامتنا
بنتزحلق
رافعين الراية البيضا...
والرايه السودا
فوق سرا يرنا
بنحلمها .
ماشيين ...
في طابور السير
- الله يمسيه بالخير-
لسه فاكرنا
غنينا ساعتين
في العمر
وباقى العمر
اتغنى علينا
....
ماشيين
من ( راس بستان الاشتراكية )
عدينا ع البر التانى
وأغاني النصر
معديه
ووصلنا خصخصة الميه
ورصاصه ف جيبنا
مصديه
...
ماعادتش بتفرق
لو قسمت رغيف العيش
ع الاتنين
أو ع الستين سبعين مليون
ماهو نص رغيف العيش
محجوز للجيش
والنص التانى
في بطن شاويش
والنص التالت
والرابع
والخامس
بح .... ما فيش
.....
ماعدتش بتفرق
مش فاضل
من عشق جمال للثوره
غير عشق جمال
ولا فاضل
من احلامنا بالحريه
وبالقومية
غير احلامنا
مش فاضل
من دعوة أم
ساعة فجريه
على الحكام
وطابور العيش
غير الحكام
وطابور العيش
....
إسم الشاعرإسم الكاتبالبلدإسم القسمالمشاهدات
عصام رجب حسينعصام رجب حسينمصر☆ دواوين الأعضاء .. عامِّي1059
لاتوجد تعليقات