تاريخ الاضافة
الجمعة، 4 يناير 2008 08:46:10 م بواسطة المشرف العام
0 1187
الدار
الدار لا كـدرت صافـي مشاربهـا
مـا قادنـي يمهـا شــف ولا راده
أشـوم عنهـا وأخليهـا وأجنبـهـا
الذيب يبخـص مصاديـره وميـراده
العين مـا تبكـي إلا مـن سبايبهـا
الوقـت غـلاب والعربـان نقـاده
سـود الليالـي كثيـراتٍ عجايبهـا
تضحك عيال الخدم وتزعل السـاده
يـا عـل ربـي يعدينـا مصايبهـا
عن ما جرى للعرب ما هيب نشـاده
أحـدٍ يصـدق بهـا وأحـدٍ يكذبهـا
وابن الرخم يحتفل في عيـد ميـلاده
أعـز نفسـي وأعزيهـا وأعاتبهـا
وكثر المجامل ترى ما هوب لي عاده
إن كان نفس الولد نالـت مطالبهـا
وإلا قعـد مقعـد الحقـران مقعـاده
كـل الخلايـق لهـا ربٍ يحاسبهـا
واللي تمني كثيـر منـاه مـا فـاده
اللي يعمـر بهـا واللـي يخربهـا
واللي يواعـد ولا يصـدق بميعـاده
أرض الله الناس تسعى في مناكبهـا
كـلٍ بفالـه بمحـداره ومسـنـاده
بعض الرجاجيل لو تنتف شواربهـا
إن كان رأسه يخلي الـزود وعنـاده
يمناً تقصر عـن الماجـوب عقبهـا
تستاهل اللـوم دوم الـدوم وزيـاده