تاريخ الاضافة
السبت، 26 يناير 2008 12:42:37 م بواسطة المشرف العام
0 481
هايب
-1-
السحاب مشبك ف بعضه
مسدودة فتحات التهوية
كتكوت ما يملكشى غير الصوصوه
دايخ فوق تضاريس الأرض :
متمدده زى عجوز
أنعكش رمادها شوية وشوية أسرحة
-مرة واحدة بقت كل حاجة فخ ؟
- الرعد إيد الرب
صوت الفرج
فسمعنى
نفسى أستحمى بالصخب
- إعملك همه
- ياما حلمت إنى شايل الشمس فوق كتفى
وبحق وحقيق بأفتش زى مجذوب
ف أعشاب دابت من التفتيش
يا اللى إنتى شمسى رحتى فين ؟
يا اللى إنتى شمسى رحتى فين ؟
- بطل تحلم حلمك مش على قدك
- كل المفاتيح مختفيه !
-2-
أغمض
أفر شريط الفوتوغرافيا
ينفرط
خوفى القديم من قناوى ف باب الحديد
أحلامى الزهقانة م النشيد الوطنى
الناس البلدا بيسمعوا لبعض الجرايد.
-3-
حالة الناس وحشة
أغمس صوابعى العشرة فـ الشق من بنى أدم
أدى ضهرى للتواريخ وهاتك يا جرى.
-4-
ميكروباص محشور وكتمه
مدفوس أنا فيه
صوتى ما يخرقش سقفه
ولا صوت يعلى
على صوت الرعد الغايب
أصوات تزغزغ بعضها :
- النهارده مش طبيعى
-ريحة بنزين بتقلب المعده
- ميكروباص فقر
- دى ريحة دخان
- فات الأوان
- كان عود كبريت
- قلة أدب
وسط كل دول ما أملكش غير إنى أقول
حدبلغ المطافى
أو صو صو صو.
إسم الشاعرإسم الكاتبالبلدإسم القسمالمشاهدات
صالح الغازيصالح الغازيمصر☆ دواوين الأعضاء .. عامِّي481
لاتوجد تعليقات