تاريخ الاضافةتاريخ التعديل
الإثنين، 9 نوفمبر 2009 05:29:13 م بواسطة المشرف العامالإثنين، 9 نوفمبر 2009 07:59:46 م
0 1014
الضايعه
الضايعه تبدا من القيل والقال
لوكان ما للخلق عندك مطاليب
دنياك لو تغري مقامك بالاقبال
عن وجهها جود لكفك مقاضيب
اقضب عنان العقل عن كل مختال
ولا توقف ماقف الشك والريب
كم هرجة يفرط بها حرص عذال
تظهر فوات الحرص عندالأجانيب
ويركب ظهرها كل مبغض وختال
ويسوقها سوق العرب للمناجيب
الناس دون احساس ما ترحم الزال
إلا عـــليه يوثقون التعاجيب
مشاكل ايامك عريضات وطوال
تفرق بها خبث الونوايا من الطيب
هذا وحظي طول الايام ما مال
راسي رفيعٍ عند سئّال ومجيب
حنيفي بالفعل من حومة ابطال
حظي من التاريخ بيض المكاتيب
من فضل رب بالخفا يعلم الحال
نارد على عسر الموارد لياهيب
ياللي تحسب العز في كثرة المال
فقد الجماله والتجمّل هو العيب
العود لو هو ميت جاله اظلال
جاله ظلال عن سموم اللواهيب
المال مثل الفي في كل الاحوال
حظٍ من اللي يعلم السر والغيب
من لا يموت الحظ به مات ماطال
ولا غنم يوم السعد بالمواجيب
الدين عز ورايته طيب الاعمال
فزعة خفا على النقا للأصاحيب
وثق كلامك فالمواقف بالافعال
و لا تطاول من على حق ومصيب
اصبر على الميلات والرب حلال
الصبر مفتاح لصافي المشاريب
الصبر مفتاح الفرج ما به اشكال
يرقى به الرجال روس المراقيب