ياسعود شفّي لا استوى الكيف فنجال |
يطرب عماس الراس لا صك جولـه |
|
و كيف المراجل ما تبي كل رجـال |
الرجل مـا يسـوى بليّـا فعولـه |
|
الرجل ..يا تاجه على راسه .. افعـال |
والا كما الاسفار.. تحمـل ذلولـه |
|
ما هي بلحية شايبِ بالعمـر طـال |
و لا بصيت المشيخـه والحمولـه |
|
المرجله ..طبعٍ كما الغيـث همّـال |
جود وسخا ..و الطيب دايـم هطولـه |
|
طبع الشبل ضاري على كيف الابطال |
اهل الشيم..واهل الوفـا والصمولـه |
|
يارد على بير المكـارم ليـا جـال |
و يشرب قراح العز لا صدّروا لـه |
|
له بالصداقه عـزوةٍ دونهـا اقفـال |
تطغى على صعب المواقف سيولـه |
|
اللي سواته نحسب افعالـه اثقـال |
معدن ذهب ما غيّر الدهـر زولـه |
|
والا الردي .. يا سعود بالشر له فال |
عوّد على طـرد الهزايـل خيولـه |
|
همّاز.. لمّاز النمايـم والاقـوال |
تدمي عراقيـب الخلايـق بهولـه |
|
ما ينفعه بالصيـت عـمٍِ ولا خـال |
كـل ِ بمـا تفعـل يدينـه ينولـه |
|
هذا الزبد يطفي على ضفـة الجـال |
و قاع البحر مخبـور درّه و لولـه |
|
اغنم حياتـك دام عمـرك بالاقبـال |
العمر ما يرجع ليـا حـال حولـه |
|
يكفيك عن ذكر القصايد و الامثـال |
تتبـع كتـاب الله وسنـة رسولـه |