تاريخ الاضافة
الأحد، 29 مايو 2011 03:11:01 م بواسطة د. جمال مرسي
0 785
يا شعب فووووق
يا شعب فوووق
( بعد أحداث الفتنة الطائفية الأخيرة في مصر 25 يناير و آخرها أحداث إمبابة )
مستخسرين فينا الفرح ؟
ليه القساوه ف. قلبكم بانت
و نخل الزيف طرح ؟
هوَ احنا مش برضو الحبايب و القرايب
و الجيران اللي هتفنا في الميدان
ع. الصولجان اللي ظلمنا
لحد ما الصوت اتنبح ؟
تلاتين سنه و قلوبنا منه بتندبح
و فرِحنا لما الظلم راحْ .
و النور ملا الأرض البراحْ
يا شعب كان مليان جراحْ .
ليه انهارده بنتجرح ؟
طب ليه بإيدنا منا فينا
نبدر الدمعه الحزينه
يطرح الشوك ف. المدينه
لما ديب الفتنه في الشارع سرح .
و انا هفضل اسأل :
ليه نغرّق السفينه
بإيد عماد الدين و مينا
اللي كانوا اصحاب و يامه
قابلوا بعض بابتسامه
و ياما كانوا صف واحد
لما كان الموج معاند
و اما حوت الظلم في بحورهم سبحْ .
ألف ميت مليون خساره
ع. البراءة و الطهاره
لما في لحظة شطاره ...
كل شيء حلو انهارده بالقساوه بيتمسح .
ليه روحنا نهدم حلم أخضر
في القلوب هلل و كبّر
من يناير كل يوم عن يوم بيكبر
زي طفل اتلونت ايامه
بالنور و الفرح .
هو احنا ايه ؟ ساكنين في غابه ؟
فوق يا شعب و خلي بالك م. الديابه
قبل ما الأحلام تموت
أو شملنا يسكن تابوت
أو تنفرط من بين اديك كل السبح .
يا شعب فووق
علشان بجد الكيل طفح
إسم الشاعرإسم الكاتبالبلدإسم القسمالمشاهدات
جمال مرسيجمال مرسي عاميمصر☆ دواوين الأعضاء .. عامِّي785
لاتوجد تعليقات