تاريخ الاضافة
الأربعاء، 23 نوفمبر 2011 12:14:47 ص بواسطة الشمالي جمهور سفر العصيمي
1 628
أنا القمر
الساعه الثالثه عصرا بعيد الزوال
الله من هاجسٍ لازال بي مستمر
أثقل من طويق وأمضى من رهيف السلال
وأعنف على القلب من شبّة جروم السمر
أغرقتني في بحر تسعين ياابن الحلال
وعوّدت أغني على ماقال يحيى عمر
(قف هاهنا بسألك يازين وش ذا الجمال
سالك بمن كحل اعيانك وأسقى اْلثمر)
شوف المعنى ليا هبت هبوب الشمال
ياوجد روحه ليا طاب الهوى والسمر
وإن دار كاس الغرام براس خلك وجال
وصل لحد الفضا من دون يشرب خمر
تميل بي يمك الأشواق حتى يقال
مافيه عاشق كذا . ونهايته مندمر
ليت الخساره ليا حللت تجي وسط مال
مير الخساره خساره لو تجي فالعمر
بسبابك أنته , نعم أنته ذبحت الرجال
ياقاتل بناب حبك عاشقك يانمر
مجنون حبك ورى جنه طلع به خبال
وش عاد تبغى من المجنون آمر أمر
لبيه ياسيد ربّات الحلا والدلال
يافزعة الله يالكزس يابنز وهمر
ياصاحبي مابها روحه وقولة تعال
لو تنفخ النار ماتطفي . تعوّد جمر
بقول لك شئ في بالي وابضرب مثال
والخافي العالم الله فيه أدهى وامر
أنا القمر لو يدور الوقت وارجع هـلال
لكن مهما يدور الوقت أبقـى قمـر
حتى على الشمس لي بصمه وليه ظلال
وأصرف من الراس بعـد الله ثـم الكمـر
دوّن بكراستك شيئا لفصل الجدال
لا لوني ابيض ولاحتى خدودي حمر
قناص شاعر رصيدي غترتي والعقال
بدو بدو شربي الدله وزادي تمر
إسم الشاعرإسم الكاتبالبلدإسم القسمالمشاهدات
الشمالي جمهور سفر العصيميالشمالي جمهور سفر العصيميالسعودية☆ دواوين الأعضاء .. عامِّي628
لاتوجد تعليقات