تاريخ الاضافة
الخميس، 16 فبراير 2012 07:23:07 ص بواسطة عاطف الجندى
0 420
سألتينى
***
أنا عاشق باقول أشعار
و أحلامى فى ليل ونهار
يعدّى الفجر من بابك
على بابك
بعد العمر بالثانيه
و لا ثانيه تفارقينى
ولو ليلة يجينى النوم
أشوف ف الحلم تكوينى
بينده لك
تلبّينى
و أعدّى ف بحرك الدوّار
ونتلاقى
فى مِيت مشوار
فى موجه
وبحر
و سفينه
أنا ملاح
و أحلامى فضا وبراح
بيخنقنى
زحام الكل يا سمره
ومش عارف أجيكي
إزّاى
وأنت ِ الدم
ف عروقى و شرايينى
سألتينى عشقتك ليه؟
وهوّ العشق من أمتى
يكون بمعاد
وأسبابه تكون واضحه
أنا بهواك ِ
بطببيعتى البدائيه
و أحلامى الخرافيّه
بلا إتيكيت
أنا بهواك ِ م الذّّرّه لحد الغيط
و لاونِّك
ساعات تنسي
تحبّينى
و تنسسينى
وألاقى ولادك الظَلَمه
يدوسوا ف جرحى و أنينى
وحتى الحلم يا سمره
يقولوا حرام
وأحضانك تكون للغير
وأنا إبنك
ومش لاقى فتات الطير
ومش قادر أكون جاحد
ولا قادر
أروح للغير
ولا أخونك
و لا أتمنى يجينى الحب من غيرك
سألتينى
كرهتك؟
لا
وعمر الكره ما يجينى
مانا إبنك
وأنا نخلك
وأنا ترابك
وأنا جزئك
وأنا كلّك
وأحبابك
وأنا رصاصه لمن عابك
ما تسألنيش على حاجه
ماليش حاجه فى إغضابك
أنا كفايه أكون إبنك
ولو موتى
بأعتابك!
***
2/5/1998
* من ديوان ( العيون السود ) الصادر فى يناير 2012 عن سلسلة منتدى عاطف الجندي الأدبي
إسم الشاعرالبلدإسم القسمالمشاهدات
عاطف الجندىمصر☆ دواوين الأعضاء .. عامِّي420
لاتوجد تعليقات