تاريخ الاضافة
الخميس، 16 فبراير 2012 07:28:33 ص بواسطة عاطف الجندى
0 374
م النهارده
***
م النهارده يا حبيبتى
هازرع الأحلام فى أرضك
تطرح الأحلام سنابل
والسنابل
هاهديهالك
باعشقك طولك وعرضكْ
***
قلبى نبته من ترابك
والتراب يا أميرتى منه
كان أبونا
زعفران مع تمر حنه
توته جنب الساقيه جنه
فوق غصونها إنت ِيمامه
واليمام يعجبنى صوته
منظره هادى
ولكنُّه
عاوز الحريه دايماً
وأنا والله لما شوفتك
جاتنى نبضة من وريدى
قالت الأيام فى قربك
قوس قزح
جانى فى عيدى
ما تقوليش حريه قلبى
عاشق القيد الحديدى
***
م النهارده
يا حبيبتى
إبتدا بينا الكلام
بعد هجر سنين طويلة
مش هانحكى فى اللى كان
المهم إن إحنا نبقى
حلم واحد
فى الزمانْ
***
يا حبيبتى م النهارده
حلمنا أصبح حقيقه
حلمنا مش بس صُحبه
و انتِ أكتر من صديقه
حلمنا آدم وحوَّا
يدخلوا الجنة البريئه
***
20/2/1999
* من ديوان ( العيون السود ) الصادر فى يناير 2012 عن سلسلة منتدى عاطف الجندي الأدبي
إسم الشاعرالبلدإسم القسمالمشاهدات
عاطف الجندىمصر☆ دواوين الأعضاء .. عامِّي374
لاتوجد تعليقات