تاريخ الاضافة
الخميس، 16 فبراير 2012 07:34:10 ص بواسطة عاطف الجندى
0 388
مارد
***
قالوا وقالوا ف حسنك ياما
و انتِ يا سمره
بلون النيل
لون القمح الأخضر طالع
يطرح جيل
من بعد الجيل
توبك خُضْره
و ويا اصحابك
زىِّ الغصن لغصن
يميلْ
أما أعدائك
فيا طول ليلهم
مهما يكونوا يشوفوا الويلْ
***
فاكره يا أمى؟!
فاكره يا أمى التار البايت ؟!
فاكره أحزان 67 ؟!
لما خانوكِ أولاد الهرمه
وعضوا ايديكِ
شِمال ويمينْ
سينا البكر خدوها سبيه
ف لحظة غفله 00 وغمضة عين
***
لما ناديتِ لكل ولادك
جُولكْ
ياخدوا بتار العيله
شرف الأرض 00
دا زى العِرضْ
والله ما نمنا عليه
لو ليله
ويوم السادس من أكتوبر
غنى المدفع
لما أولادك
عبروا الخوف للضفه التانيه
عِزْ الضُّهر
ف شهر الخير
صوت الضرب ف كل مكان
ناره بتشوى أولاد الإيه
( عبد العاطى)
عارفه يا أمى
ابن النيل والطين المصرى
فلاح عارف
معنى العِرض
عرقه بتشرب منه الأرض
كان ويَّايا
ف نفس كتيبتى
زيِّى
ف شكلى و لونى و طيبتى
***
لما عبرنا الضفه التانيه
إتغيرنا
إتحولنا00 بقينا أسود
صوت الباطل
منا يولِّى
وصوت الحق ما غيره يسود ْ
عبد العاطى الجو
بيضربْ
عبد العاطى الأرض
بيضربْ
عبد العاطى البحر
بيضربْ
إضرب ، إضرب
إمسح تارى و عارى و خيبتى
خلى فيران القرصان الأعور
يدخلوا تانى
جوَّا جحورهم
خلى كلاب الست مائير
يهزوا ديولهم
لجل خالتهم
_ مالكه العالم _
تبعت سرب ، عشان ينقذهم
والله ما فادهم
والله ما فادهم
كان المارد برَّه و حالف
عمره ما يرجع
تانى القمقم
نصر بدمِّى يا أمى
أنا كاتبه
كل أولادك 00 عبد العاطى
أحمد
جرجس
مسلم
مينا
راح تلاقينا
ف وقت الشِّدَّه
- ليوم الدين –
عمرنا ما نطاطى
***
يلاَّ يا أمى
قومى ارفعى راسك
كل ولادك دول حرَّاسك
يا اللى جمالك آيه يا بلدى
وأحلى ما فيكِ
شهامة ناسكْ
أحلى ما فيكِ
شهامة
ناسك
***
14/10/1999
* من ديوان ( العيون السود ) الصادر فى يناير 2012 عن سلسلة منتدى عاطف الجندي الأدبي
إسم الشاعرالبلدإسم القسمالمشاهدات
عاطف الجندىمصر☆ دواوين الأعضاء .. عامِّي388
لاتوجد تعليقات