تاريخ الاضافة
الخميس، 16 فبراير 2012 07:53:08 ص بواسطة عاطف الجندى
0 429
مشروع فاشل
***
مشروع فاشل
إنك تكتم حبك ليها
و تخجل مرة
ف يوم تتكلم
***
و تبوح ليها بكل مشاعرك
توصف جرح
ف عمرك علم
***
يا ما سهرت بترسم طيفها
بريشة نبضكْ
يا ما حكيت للنجم جمالها
و إزاي عشش
جوه ف قلبك
لجل ماتوصل لعيون قمرك
و إزاي فارد
صبرك 000 سلم
***
و إزاي كانت
زهرة بريئة
بتكبر قدام أحلام عمرك
وأنت العاشق ، دايب فيها
وليها بتهدي مراكب شِعرك
بحرك يغلي
وموجه مْسَلم !
***
ألفين مره
بتحلف إنك
لما تشوفها هتعلن ليها
مشاعرك صدقك
لكن لما تشوفها بتنسي
و تفضل سارح ف خَضَار أملك
و اما تدقق 00 تلمح طيفك
جوه عينيها تملي مبلم
***
و اما تشوفها بتحكى لغيرك
و لا بتضحك
ضحكة فرح 00
الود ماليها
بتقيد نارك
ينزل دمعك ، ما يطفيها
ترجع ويَّا الليل تتألم
***
ترجع تحلف 00
و اما تشوفها
بترجع تانى
لنفس الكرَّه
و توه تانى ف نفس مشاعرك
بره و جوَّا
و اما تسيبها
تشعر إن الكون بيضلم
***
و أنت العايش بيها و ليها
و نبض مشاعرك
ساكن فيها
قرب ، مره
بس ، وسَلِّم
***
و انت تلاقى الرد ف نظرة
و بسمة وجد
الحب ماليها
كل أحلامك
راح تتحقق
تلقى ف إيدك 00 نبض أيديها
رجَّع كل الناس تتعلم
***
بس ساعتها
هاتعرف أنك
مشروع ناجح
و إن الكون
منك يتعلم
***
2/2/2001
* من ديوان ( العيون السود ) الصادر فى يناير 2012 عن سلسلة منتدى عاطف الجندي الأدبي
إسم الشاعرالبلدإسم القسمالمشاهدات
عاطف الجندىمصر☆ دواوين الأعضاء .. عامِّي429
لاتوجد تعليقات