تاريخ الاضافة
الخميس، 16 فبراير 2012 07:55:09 ص بواسطة عاطف الجندى
0 411
بُلطية
صباح الخير يا بلطية
صباح النور
يا أحلى عيون تشاغلنى
فى كل صباح
بتطلع لى
كشمس بتنشر الصحبة
على الدنيا
تدفِّينى فى عِز البرد
بلقاها
دفا وبراح
يا عايقة بلونك الخمرى
دا رسمك فى الدنا
خَمْري
وعودك زان على عمرى
أنا باهوى عينيكِ السود
وشعرك
تحت تحجيبة
يطل بذوق
و رسمة شِفِّتك لما تنادينى
أبصِّ لهم و أتسائل
كريز ولاَّ
مارون جلاسيه ؟!
***
شفايفك خوخ من الجنة
وبسمة سِنِّتك لما
أقول لك
يا قمر عمرى 00
يا حلوه
بصِّى ف عينيَّه
هتلقى رسمك الفتَّان
جمال طازج
جمال صارخ بلا ألوان
جمال إنسانه هيمانه
فى حب كبير
***
صباح الخير يا بلطية
تردِّى بصوتك النعسان
صباح النور
وجنبك أقعد القعده
كراهب يطلب الغفران
ويحلم يدخل الجنة
يصلى الفرض و السنه
ويحكى لك على شوقه
وعن ولعه بغصن الزَّان
وعن رمَّان
طرح ع الغصن و استنى
لحد ما طاب
وعن تفاح
وعن سُرَّه
وعن رِجْلين
وعن ضمه تضميها
وعن خوخه أنا أديها
لخد الشوق
تتوهى منى فى السِّكه
و اناديكِ
تعالى ندخل الجنة
بلا تصريح
ولا رقابه تصنَّفنا 00
يمين وشمال
ولا ديابه تحاوطنا
ولا فيه حد له حاجه
فلا يمشّيِنا على كيفه
مادام احنا طيرين كنا 00
ومازلنا
فهل شوفتى طيرين مرَّه
بياخدوا إذن فى مقابله؟!
وهل شوفتى
غزالة خايفه من نظره
و كلام خرفان ؟!
فليه إحنا
مانبقاشى
أحن إتنين
على بعضينا 00 نتقابل
بلهفه وشوق
و طُز ف كل ما نلقى
من الدنيا
وغيرنا الكل ما يساوى
سوى شوطه
من الجزمه
وكلمة
ييييييه !
***
1/5/2000
* من ديوان ( العيون السود ) الصادر فى يناير 2012 عن سلسلة منتدى عاطف الجندي الأدبي
إسم الشاعرالبلدإسم القسمالمشاهدات
عاطف الجندىمصر☆ دواوين الأعضاء .. عامِّي411
لاتوجد تعليقات