تاريخ الاضافة
الخميس، 16 فبراير 2012 08:00:41 ص بواسطة عاطف الجندى
0 412
دون جوان
و كإنك قاعد فوق العرش
بتنهي وتأمر يا اسمك أيه
والناس حواليك
مشدودة إليك
أشكال و الوان
بتسمي عليك وتبوس رجليك
و بتحلف ليك إنك سلطان
مِش م الإنسان
بل نص إله
ماتحبش ليه يا كَريه خَرفان
والسُّلطة بتاعتك
عند إخواتنا البُعدا
تقول إنك أجمل إنسان
لا "حسين أبو فهمي "ولا " ابن ياسين"
راح ييجوا ف ضافرك
ما انت خلاص عديت طرزان
ودخلت ف سكة
" جيمس أبو بوند"
و "جِبيل" جنب وسامتك
زى الماكنة
ناقصها جوان
مع إني قعدت أبحث في محاسنك
ورا نضارتك
شُفت إنك حَولان
سبحانه
بيدي المِعزه
القدرة على الطيران
و بيدى النمل الساكن ليفة شَعرك
عدم القدرة على الغثيان
و الأدهي يا آخي إنك فلاح
وتركت الأرض
ومعني العِرض
وسارح ورا حبة غزلان
راح تنشر ليهم
جوَّا جريدتك
أي كلام
وهباب
قطران
راح تفتح ليهم
طاقة الشهره
و يصبحوا شُعرا لكل زمان
طب كنت تراعي ضميرك والله
وحُضن لبلدك
أجدع من حضن النسوان ْ !
***
أما الرجاله حالتهم حاله
إن طاطوا هياخدوا الشهره
يعيشوا خِرفان
منعوله العيشة اللي تخليني
أبص ف وشَّك
وتخليني أقول لك يوم
أنا فيك عشمان
منعولة الشهره اللي تخليني
أقول للضفدع
والله قوامك بقي مانيكان
والنعمة أنا لما باشوفك
بضرب كف بكف
وأقولها
والله النمله
بقي لها أسنان!
***
20/1/2001
* من ديوان ( العيون السود ) الصادر فى يناير 2012 عن سلسلة منتدى عاطف الجندي الأدبي
إسم الشاعرالبلدإسم القسمالمشاهدات
عاطف الجندىمصر☆ دواوين الأعضاء .. عامِّي412
لاتوجد تعليقات