تاريخ الاضافة
الخميس، 16 فبراير 2012 08:05:08 ص بواسطة عاطف الجندى
0 406
خمسة حارة الآخرة
إلى روح صديقى/ عابدين مرسى
كان النهار مخنوق
وشمسه مدغمسه
ويونيه
خانق جتتى
ممنوع تبحلق فى السما
أصل الكسوف
مكتوب على
وش الحليوه المُغرمه
قالوا القمر
عدَّى عليها إتحجبت
***
قالت إذاعتنا وإذاعات الدِّول
اللى يبحلق
يتعمى 00
خافوا البشر
ماشى لوحدى والطريق
مليان حُفر
القطر فاضى
عدَّى جنبى
اللى ياما فيه ركبت
وكنت دايماً
باتحشر
***
جاى لك يا صاحبى
والحنين
عَمَّال ياخدنى لسكتى
رمل الطريق
عاشق لِلَمْسِة خطوتى
عشرين سنه
من صُغر سنِّي باعرفك
فين اللقا
متخبى ليه؟!
و سايبنى أقاسى ف وحدتى
فاكر يا صاحبى
لما كنا
تلميذين؟!
ياما كنت شاطر فى الغنا
كنت بتغنى" لحليم"
والحلم دايماً
ضمِّنا
وأنا كنت أقول لك
قول كمان
غنى يا صاحبى وطير بنا
للنجم
لجزيرة بعيدة
للخيال
خبَّط ونادى ع البيبان
صحِّى اللى ساكن
صدرنا
***
عارفك يا " أبو حُمُّص"
وعارف سِكتك
بين المزارع والغيطان
رُزَّك بيضحك للى راجع
يحملك
قُطنك بيتمايل عيدان
الفرحه وخدانى
وسابقه خطوتى
وف " عزبة الجَرَادات" رايح لك
يا اللى شاغل قصِّتى
القلب زاد النبض
و الفرحه ف خدودى
والسِّن راسم ضحكتة
هاخدك فى حضنى
وأبوس عينيك
أمسك إيديك
خبَّطت بابك
جانى واحد مش عارفنى
قال لى عزِّل
راح لأبوه
خمسة حارة الآخرة !
***
من يوم ما مات
ساب لى دمعى
وذكريات !
***
15/9/1999
* من ديوان ( العيون السود ) الصادر فى يناير 2012 عن سلسلة منتدى عاطف الجندي الأدبي
إسم الشاعرالبلدإسم القسمالمشاهدات
عاطف الجندىمصر☆ دواوين الأعضاء .. عامِّي406
لاتوجد تعليقات